Free eBook, AI Voice, AudioBook: Le roman de la rose - Tome IV by de Lorris Guillaume

Listen to the AudioBook: Le roman de la rose - Tome IV by de Lorris Guillaume

LE ROMAN DE LA ROSE

XCI

Comment Nature la subtille Forge toujours ou filz ou fille, Affin que l'humaine lignye Par son deffaut ne faille mye.

Et quant ce serement fait orent, Si que tuit entendre le porent, Nature, qui pensoit des choses Qui sunt desouz le ciel encloses, Dedens sa forge entrée estoit, Où toute s'entente metoit A forgier singulières pieces Por continuer les espieces: Car les pieces tant les fet vivre, Que Mort ne les puet aconsivre: [Jà tant ne saura corre après; Car Nature tant li va près, Que quant la Mort o sa maçuë Des pieces singulieres tuë Ceus qu'el trueve à soi redevables, (Qu'il i en a de corrumpables Qui ne doutent la Mort néant, Et toutevois vont dechéant,

S'usant, et par le tens pourrissent Dont autres choses se norrissent); Quant toutes les cuide estreper, Nes puet ensemble conceper: Que quant l'une par-deçà hape, L'autre par-delà li eschape. Car quant ele a tué le pere, Remaint-il fiz ou fille ou mere, Qui s'enfuient devant la Mort, Quant il voient celi jà mort. Puis reconvient iceus morir, Jà si bien ne sauront corir; N'i vaut médecines, ne veus. Donc saillent nieces et neveus Qui fuient, por eus deporter, Tant cum piez les puéent porter; Dont l'ung s'enfuit à la karole, L'autre au monstier, l'autre à l'escole, Li autre à lor marchéandises, Li autre as ars qu'il ont aprises, Li autre à lor autres deliz De vins, de viandes, de liz: Li autre, por plus tost foïr, Que Mort ne les face enfoïr, S'en montent sor lor grans destriers A tout lor sororés estriers. L'autre met en ung fust sa vie, Et s'enfuit par mer à navie, Et maine au regart des estoiles Ses nefz, ses avirons, ses voiles: L'autre, qui par veu s'umilie, Prent ung mentel d'ypocrisie, Dont en fuiant son penser cuevre, Tant qu'il apert dehors par uevre.

You can download, read online, find more details of this full eBook Le roman de la rose - Tome IV by de Lorris Guillaume from

And convert it to the AudioBook with any voice you like in our AI Voice AudioBook app.